॥ అథ ద్వాదశస్తోత్రే అష్టమోఽధ్యాయః ॥


వందితాశేషవంధ్యోరువృందారకం
చందనాచర్చితోదారపీనాంసకమ్ ।
ఇందిరాచంచలాపాంగనీరాజితం
మందరోద్ధారివృత్తోద్బుజాభోగినమ్ ॥
ప్రీణయామో వాసుదేవం
దేవతామండలాఖండమండనమ్ ॥౧॥


సృష్టిసంహారలీలావిలాసాతతం
పుష్టషాగుణ్యసద్విగ్రహోల్లాసినమ్ ।
దుష్టనిశ్శేషసంహారకర్మోద్యతం
హృష్టపుష్టానుశిష్టప్రజాసంశ్రయమ్ ॥
ప్రీణయామో వాసుదేవం
దేవతామండలాఖండమండనమ్ ॥౨॥


ఉన్నతప్రార్థితాశేషసంసాధకం
సన్నతాలౌకికానందదశ్రీపదమ్ ।
భిన్నకర్మాశయప్రాణిసంప్రేరకం
తన్న కిం నేతి విద్వత్సు మీమాంసితమ్॥
ప్రీణయామో వాసుదేవం
దేవతామండలాఖండమండనమ్ ॥౩॥


విప్రముఖ్యైః సదా వేదవాదోన్ముఖైః
సుప్రతాపైః క్షితీశేశ్వరైశ్చార్చితమ్।
అప్రతర్క్యోరుసంవిద్గుణం నిర్మలం
సప్రకాశాజరానందరూపం పరమ్ ॥
ప్రీణయామో వాసుదేవం
దేవతామండలాఖండమండనమ్ ॥౪॥


అత్యయో యస్య కేనాపి న క్వాపి హి
ప్రత్యయో యద్గుణేషూత్తమానాం పరః।
సత్యసంకల్ప ఏకో వరేణ్యో వశీ
మత్యనూనైః సదా వేదవాదోదితః ॥
ప్రీణయామో వాసుదేవం
దేవతామండలాఖండమండనమ్ ॥౫॥


పశ్యతాం దుఃఖసంతాననిర్మూలనం
దృశ్యతాం దృశ్యతామిత్యజేశార్చితమ్ ।
నశ్యతాం దూరగం సర్వదాఽప్యాత్మగం
వశ్యతాం స్వేచ్ఛయా సజ్జనేష్వాగతమ్ ॥
ప్రీణయామో వాసుదేవం
దేవతామండలాఖండమండనమ్ ॥౬॥


అగ్రజం యః ససర్జాజమగ్ర్యాకృతిం
విగ్రహో యస్య సర్వే గుణా ఏవ హి ।
ఉగ్ర ఆద్యోఽపి యస్యాత్మజాగ్ర్యాత్మజః
సద్గృహీతః సదా యః పరం దైవతమ్ ॥
ప్రీణయామో వాసుదేవం
దేవతామండలాఖండమండనమ్ ॥౭॥


అచ్యుతో యో గుణైర్నిత్యమేవాఖిలైః
ప్రచ్యుతోఽశేషదోషైః సదా పూర్తితః ।
ఉచ్యతే సర్వవేదోరువాదైరజః
స్వర్చితో బ్రహ్మరుద్రేంద్రపూర్వైః సదా ॥
ప్రీణయామో వాసుదేవం
దేవతామండలాఖండమండనమ్ ॥౮॥


ధార్యతే యేన విశ్వం సదాజాదికం
వార్యతేఽశేషదుఃఖం నిజధ్యాయినామ్ ।
పార్యతే సర్వమన్యైర్న యత్పార్యతే
కార్యతే చాఖిలం సర్వభూతైః సదా ॥
ప్రీణయామో వాసుదేవం
దేవతామండలాఖండమండనమ్ ॥౯॥


సర్వపాపాని యత్సంస్మృతేః సంక్షయం
సర్వదా యాంతి భక్త్యా విశుద్ధాత్మనామ్ ।
శర్వగుర్వాదిగీర్వాణసంస్థానదః
కుర్వతే కర్మ యత్ప్రీతయే సజ్జనాః ॥
ప్రీణయామో వాసుదేవం
దేవతామండలాఖండమండనమ్ ॥౧౦॥


అక్షయం కర్మ యస్మిన్ పరే స్వర్పితం
ప్రక్షయం యాంతి దుఃఖాని యన్నామతః ।
అక్షరో యోఽజరః సర్వదైవామృతః
కుక్షిగం యస్య విశ్వం సదాఽజాదికమ్ ॥
ప్రీణయామో వాసుదేవం
దేవతామండలాఖండమండనమ్ ॥౧౧॥


నందితీర్థోరుసన్నామినో నందినః
సందధానాః సదానందదేవే మతిమ్ ।
మందహాసారుణాపాంగదత్తోన్నతిం
నందితాశేషదేవాదివృందం సదా ॥
ప్రీణయామో వాసుదేవం
దేవతామండలాఖండమండనమ్ ॥౧౨॥


॥ ఇతి ద్వాదశస్తోత్రే అష్టమోఽధ్యాయః ॥